文／鍾宙蒔，社會人士，苗栗頭份人，這下戴苗栗頭份市（四縣腔）
講著傳染病人人就驚！傳染病老古時代安到「發瘟仔」；發瘟仔時，不管遰个係人抑係動物，想著還得人畏，毋係爪頭那殼，無就起雞嫲皮！
台灣自2019年新冠肺炎（COVID-19）流行開始，大家漸漸仔有戴嘴揞仔、知愛輒輒洗手；該央時，大家一抹煞停忒無必要个活動，囥命較重要。恁久盡流行感冒摎諾羅病毒，流感个症頭會發燒、頭那痛、濞水流流流流、陣寒陣熱，無就喉嗹頭腫腫，食東西歸嘴仔淡濫淡濫無味無緒；諾羅病毒腸胃炎該斯毋係搞个，毋單淨前面講个症頭以外，還會肚屎絞痛、屙合翻；這病毒寒天盡常見，比將幼稚園一遰啊去滿那仔就係，細人仔透日仔目汁含等、張張掣掣，傷重个時透夜仔嘶胲另命，爺哀斯就𫟧上𫟧下皮愛弓緪來哩唷。
古來到今傳染病盡多，有人遰人个豬頭皮、發痰火、出麻仔、發瘡仔、發癩瘑啦，有傷寒、流感、腸病毒，還有花柳病、愛滋病這兜；乜有蟲仔、動物來遰分人个，像鳥仔、雞仔遰个禽流感、蚊仔遰个天狗熱、發冷仔、日本腦炎摎蝠婆仔遰个伊波拉等等。
講著這「發豬頭皮」，就係腮腺炎，傷重時面會腫起來又嘴歪目竵；頭過人發豬頭皮，聽講會在面頰卵頂寫「虎」字，希望老虎摎豬仔食忒，雖然係迷信，毋過乜算老時人个智慧，乜係一種心理暗示，人自然會較鬆爽遽遽好起來。
毋管係空氣、水抑係動物來遰分人个傳染病，一下著著，人就殗弱落去，實在毋係搞个！故所兜儕愛在逐隻環節來進行，比將講自身愛注意政令宣導，政府鼓勵个事項愛確實配合來做好；流行病嚴重个時節，無要緊个事情莫趖上趖下逛大街樣仔；續下來愛注疫苗射、出入公共場所知愛戴嘴揞仔、手愛輒輒洗淨來、愛慣用酒精來消毒等等；烏蠅拑烏蠅啄个東西，絕對就愛攉忒食毋得；屋頭屋角哪位仔整理淨來，屋前屋後个水槽、醃缸屙糟水愛倒忒，抑係用蓋仔弇起來；屋下定著愛裝紗窗、紗門抑係間肚愛掛眠帳；講去講轉恁多，大家莫嫌𠊎噥噥哢哢恁唸唸，無斯一下遰著就壞蹄哩唷！
華語
講到傳染病人人驚怕！傳染病古時候稱為「瘟疫」；瘟疫爆發時，不管傳染的是人還是動物，真讓人產生恐怖，不是害怕到抓頭就是起雞皮疙瘩！
台灣自2019年新冠肺炎（COVID-19）流行開始，大家漸漸有戴口罩、常常洗手的習慣；那時，大家立馬停止非必要的聚會活動，保命比較重要。最近很流行感冒及諾羅病毒；流感的症狀會發燒、頭痛、鼻涕流不停、忽冷忽熱，再者就是喉嚨腫痛，吃東西無滋無味；諾羅病毒腸胃炎不可輕忽，不僅僅是上述所說的症狀以外，還會肚子絞痛、腹瀉及嘔吐；這種病毒冬天很常見，例如幼稚園的小朋友一傳染全班都可能遭殃，小朋友整天眼淚汪汪、因身體不適而鬧脾氣，嚴重時整天呼天搶地的哭泣，那時父母一刻也不得安閒，要皮繃緊來因應處理了。
從古至今傳染病很多，有人傳染給人的腮腺炎、肺結核、麻疹、皮膚病像疥瘡啦、有痲瘋病啦，有傷寒、流感、腸病毒，還有像花柳病、愛茲病等等；也有昆蟲、動物傳染給人類的，像鳥兒、雞、鴨等家禽類傳染的禽流感、蚊子傳染的登革熱、瘧疾、日本腦炎及蝙蝠傳染的伊波拉病毒等等。
說到「發豬頭皮」，就是腮腺炎，嚴重時臉會腫起來嘴巴、眼睛歪斜；從前的人得腮腺炎，聽說會在臉頰上寫「虎」字，希望老虎把豬吃掉，雖然是迷信，但也算古老時候的生活智慧，也是一種心理暗示與鼓勵，病患身體自然會輕鬆加快好起來。
不管傳染源是空氣、水還是動物，一旦被傳染了，身體馬上衰弱不少，實在不可輕視它啊！所以我們需在每個環節來逐一檢視，例如注意政令宣導，政府鼓勵的事項確實配合落實做好；流行病嚴重的時節，不必要的活動應該減少辦理；再者，要施打疫苗、出入公共場所確實配戴口罩、雙手應常洗手、清潔，養成用酒精消毒的習慣等；蒼蠅叮咬過的東西，一定要丟棄不能再食用；家裡要整理乾淨，屋前屋後的水槽、水缸髒水要倒乾，並且要用蓋子掩蓋好；裝紗窗、紗門及房間要掛蚊帳；講來講去這麼多，大家切莫嫌我囉哩囉嗦啊，因為一旦被傳染就遭殃了！